Ništa nova, ništa nova posli fešte kisne vala
u pitaru lipi snova cilo lito tu si stala
Raštimane sad su ure, zatvorene gnjiju škure
Sad životu, punon zima, okrenuta nan je prova
odrišena već je cima, ništa nova, ništa nova
Pala je u more stina i prozebli grdelini
uz gradele, kraj komina nima ko da te zamini
I dok jugo stalno jača, oko kuće reste drača
Sve se sprema da podivja, a mi kano stara bova
plutamo bez pravog cilja: ništa nova, ništa nova
Uzalud privrćen foje ča će reć mi na sva justa
svi govore: bit će boje, barbirija već je pusta
Vaja vrime niz skaline vonj mižerje i morbine
I briškulu dikod baci klapa ča još ni gotova
da ostari po bonaci, ništa nova, ništa nova
Finili su pusti kanti i promukla već je klapa
i po dobru svak te panti stareć s nama sve do ščapa
Naresle su nove plime, popucale su gardine
Još se pine dugi vali i po mistu reve tovar
jarboli u more pali: ništa nova, ništa nova
