Klinčeci žarki čez oblok visiju
Čisto nad težka okovana vrata.
Hlad je od cirkve, na strmom joj krovu
Golubov bela su sela se jata.
Vidiju dalko: pod nebom tak bistrim
Rudaste šume i cirkve na bregu,
Travniki v suncu i čisto pri nebu
Tam se blisiče planina vu snegu.
Puti se vsikud razstajeju beli,
Vruće je, iskre trepećeju v zraku,
Zdalka se cesta čez strni vre zrele
K Varošu žuri i k vulicah mraku.
Ide prek mosta, pod kojim gliboko
Reka polahko zastaje sred hlada,
Njiše se kipec, tak čudno naopak:
Lipe i vulica mirnoga grada.
Kaj su to golubi zleteli s cirkve?
V strahu su: vsi su zazvoneli zvoni.
Meša je prešla, razhaja se narod,
V svili gospe su, vu črnom gosponi.
Malo pred njimi vu opravah belih
Deca im ideju tak sramežljivo.
Jedno od njih je tak lepo i sladko,
Ono mi žalosti vnogoj je krivo.
Štel bi ja znati: za koga joj drhće
Srce pod križecom onim od zlata?
Komu ti klinčeci cveteju žarki,
Komu ta težka ju čuvaju vrata?
Tihi varoš
